Deu 10 | NdeIBE | STEP | Ngalesosikhathi uJehova wathi kimi, “Baza ezinye izibhebhedu zamatshe ezimbili zifanane lezakuqala uze lazo kimi entabeni. Phinda njalo wenze ibhokisi ngezigodo.

Deuteronomy 10

Izibhebhedu ezifana lezakuqala

1 Ngalesosikhathi uJehova wathi kimi, “Baza ezinye izibhebhedu zamatshe ezimbili zifanane lezakuqala uze lazo kimi entabeni. Phinda njalo wenze ibhokisi ngezigodo. 2 Ngizabhala kulezo zibhebhedu amazwi afanana lalawo abesezibhebhedwini zakuqala, lezo owaziphahlazayo. Ube usuzifaka kulelobhokisi.”

3 Ngakho ngenza ibhokisi lesivumelwano ngezigodo zesihlahla som-akhakhiya ngasengibaza izibhebhedu ezimbili zamatshe ezifanana lezakuqala, ngasengikhwela entabeni ngiphethe lezo zibhebhedu ezimbili. 4 UJehova wabhala kulezozibhebhedu lokho ayekubhale kwezakuqala, imilayo elitshumi ayeyimemezele kini ephakathi komlilo, entabeni, ngosuku lokuhlangana. UJehova wasenginika zona izibhebhedu.

5 Ngakho ngasengibuya ngisehla entabeni ngafika ngafaka izibhebhedu ebhokisini engangilenzile, njengokulaywa kwami nguJehova, yikho zilokhu zikhona lakhathesi.

6 (Ama-Israyeli ahamba esuka emithonjeni yaseJakhani kusiya eMosera. Kulapho u-Aroni afela khona njalo wangcwatshwa khona, kwathi indodana yakhe u-Eliyazari yathatha isikhundla sakhe sobuphristi. 7 Besuka lapho bahamba baya eGudigoda bedlulela eJothibhatha, ezweni elilezifula ezilamanzi. 8 Ngalesosikhathi uJehova wehlukanisa abaLevi ukuze bathwale ibhokisi lesivumelwano sikaJehova, ukuma phambi kukaJehova besenza umsebenzi wokukhonza kanye lokwethula izibusiso ngebizo lakhe, njengoba bekwenza lanamuhla. 9 Yikho abaLevi bengelasabelo loba ilifa phakathi kwabafowabo; elabo ilifa nguJehova, njengoba uJehova wenu wabatshela.)

10 Ngasengihlale phezu kwentaba izinsuku ezingamatshumi amane lobusuku obungamatshumi amane, njengalokhu engangikwenze kuqala, lakanye wangilalela futhi okwalesi isikhathi. Kwakungasikufisa kwakhe ukulibhubhisa. 11 “Hamba,” watsho uJehova kimi, “uyekhokhela abantu endleleni yabo, ukwenzela ukuthi bangene bathathe ilizwe engafunga kuboyise ukuthi ngizabapha lona.”

Mesabeni uJehova

12 Khathesi-ke, O Israyeli, kuyini uJehova uNkulunkulu wakho angakucela kuwe ngaphandle kokuba umesabe uJehova wakho, ukuhamba ezindleleni zakhe, ukumthanda, ukumsebenzela uJehova uNkulunkulu wakho ngenhliziyo yakho yonke njalo langomoya wakho wonke, 13 lokugcina imilayo kaJehova kanye lezimiso lezi engilinika zona lamhlanje ukuze kulilungele?

14 Izulu ngelikaJehova wenu, izulu elingaphezu kwamazulu, umhlaba kanye lakho konke okukiwo. 15 Kanti-ke uJehova watshengisela isihawu sakhe kubokhokho benu njalo wabathanda, ngalokho wakhetha lina, eliyizizukulwane zabo, phezu kwazo zonke ezinye izizwe, njengoba kunjalo lalamuhla.

16 Ngakho-ke, sokani izinhliziyo zenu, njalo lingabe lisaba ngontamolukhuni futhi. 17 Ngoba uJehova uNkulunkulu wenu unguJehova wabonkulunkulu njalo unguJehova wamakhosi, uJehova ophakemeyo, olamandla njalo owesabekayo, ongelabandlululo futhi ongemukeli isivalamlomo. 18 Uyavikela izimfanelo zezintandane kanye labafelokazi, njalo uyabathanda abangabezizweni phakathi kwenu, ubanika ukudla lezambatho. 19 Ngakho kuzamele lithande abezizweni, njengoba lina lalingabezizweni eGhibhithe. 20 Mesabeni uJehova uNkulunkulu wenu njalo limkhonze. Bambelelani kuye njalo lenze izifungo zenu ngebizo lakhe. 21 Uyindumiso yenu, unguJehova wenu, owalenzela lezozimanga ezinkulu lezesabekayo elazibona ngamehlo enu.

22 Okhokho benu abaya eGibhithe babengamatshumi ayisikhombisa kuphela, kanti khathesi uJehova uNkulunkulu wenu uselenze laba banengi njengezinkanyezi esibhakabhakeni.